꧅꧕꧅

ꦮꦠꦏ꧀꧇꧕꧇

Watak 5

꧄ꦮꦠꦏ꧀ꦭꦶꦩꦮꦶꦤꦸꦂꦱꦶꦠ꧈ꦧꦸꦠꦲꦥꦤ꧀ꦮꦸꦱ꧀ꦲꦗꦂꦮꦶ꧈ꦩꦂꦩꦢꦢꦶꦮꦠꦏ꧀ꦭꦶꦩ꧈ꦢꦺꦤ꧀ꦤꦶꦁꦲꦶꦏꦸꦧꦶꦱꦤꦸꦁꦒꦶꦭ꧀‍ꦏꦭꦶꦩꦧꦺꦴꦁꦱꦤꦼꦁꦒꦶꦃ꧈ꦱꦶꦭꦸꦩ꧀ꦩꦤ꧀‍ꦩꦾꦁꦧꦺꦴꦁꦱꦩꦧꦸꦂ꧈ꦤꦸꦁꦒꦭ꧀ꦨꦁꦱꦤ꧀ꦤꦶꦁꦏꦺꦮꦤ꧀ꦨꦱꦤ꧀ꦤꦶꦁꦧꦸꦧꦸꦫꦺꦴꦤ꧀ꦮꦫꦶꦃ꧈ꦏꦭꦶꦩꦤ꧀ꦤꦺꦧꦶꦱꦤꦸꦁꦒꦭ꧀ꦩꦤꦸꦁꦱ꧉꧄

JGST : Watak lima winuṙsita, buta hapan wus hajaṙwi, maṙma dadi watak lima, dénniŋ hiku bisa nuŋgil, kalima boŋsa něŋgiḥ, silumman mỿaŋ boŋsa mabuṙ, nuŋgal bhaŋsanniŋ kéwan, baŋsanniŋ buburon wariḥ, kalimanné bisa nuŋgal manuŋsa.

EBBY : Watak lima winursita, buta apan wus ajarwi, marma dadi watak lima, déning iku bisa nunggil, kalima bongsa nenggih, siluman myang bongsa mabur, nunggal bangsaning kéwan, bangsaning buburon warih, kalimané bisa nunggal manungsa.

꧄ꦥꦟ꧀ꦣꦮꦽꦮꦢꦶꦥꦸꦠꦿꦱꦁ꧈ꦦꦟ꧀ꦣꦸꦢꦺꦮꦟꦡꦲꦗꦶ꧈ꦭꦶꦩ꧇ꦗꦸꦒꦯꦿꦶꦔꦩꦂꦠ꧈ꦢ꧀ꦮꦶꦢꦾꦤꦺꦱꦟ꧀ꦤ꧇ꦠꦿꦶꦦꦩꦢꦶ꧈ꦤꦸꦁꦒꦭ꧀ꦱꦪꦪꦃꦧꦶꦧꦶ꧈ꦏꦢ꧀ꦮꦶꦭꦺꦤ꧀ꦧꦶꦧꦶꦥꦸꦤ꧀ꦤꦶꦏꦸ꧈ꦏꦕꦠꦸꦂꦢꦾꦤ꧀ꦤꦶꦁꦏꦸꦭ꧈ꦱꦢꦺꦮꦏꦭꦶꦩꦤ꧀ꦤꦺꦏꦶ꧉ꦉꦏꦺꦠꦠ꧇ꦒꦼꦠꦶꦃꦲꦺꦴꦠꦺꦴꦠ꧀ꦠꦼꦲꦼꦱ꧀ꦱꦶꦫ꧉꧄

JGST : Paṇḍa wṛěwadi putŕa saŋ, phaṇḍu déwaṅatha haji, lima : juga śŕi ṅamaṙta, dwi dỿané saṇna : tŕi phamadi nuŋgal ṣayayaḥ bibi, kadwi lén bhibi punniku, kacatuṙ dỿanniŋ kula, Sadéwa kalimannêki. Rěké tata : gětiḥ hotot těgěssira.

EBBY : Pandha wrewadi putra sang, Pandhu Déwanata Aji, lima : juga Sri Ngamarta, dwi dyané sana : tri pamadi nunggal sayayah bibi, kadwi lén bibi puniku, kacatur dyaning kula, Sadéwa kalimanèki, reké tata : getih otot tegeṣira.

꧄ꦲꦶꦁꦤꦺꦠꦿꦔꦺꦴꦭꦃꦥꦿꦩꦤ꧈ꦲꦶꦁꦭꦶꦣꦃꦔꦺꦴꦭꦃꦏꦼꦤ꧀ꦲꦔ꧀ꦭꦶꦁ꧈ꦲꦶꦁꦠꦔꦤ꧀ꦔꦺꦴꦭꦃꦒꦲꦺꦴꦠ꧈ꦲꦶꦁꦱꦸꦏꦸꦔꦺꦴꦭꦃꦏꦼꦤ꧀ꦭꦶꦁꦒꦶꦃ꧈ꦱꦸꦩꦮꦤꦭꦸꦩꦫꦶꦱ꧀‍‍ꦲꦶꦁꦥꦽꦗꦶꦔꦺꦴꦭꦃꦫꦃꦱꦺꦏꦸ꧉ꦠꦤ꧀ꦢꦾꦒꦠꦶꦮꦽꦢꦶꦚ꧈ꦏꦼꦏꦼꦠꦼꦏ꧀‍ꦢꦺꦢꦸꦤꦹꦁꦤꦺꦏꦶ꧈ꦲꦤꦺꦁꦠꦼꦁꦒꦺꦴꦏ꧀‍ꦗꦗꦲꦸꦒꦼꦭ꧀ꦲꦸꦒꦼꦭ꧀ꦲꦱ꧀ꦠ꧉꧄

JGST : Hiŋ nétŕa ṅolaḥ pŕamana, hiŋ lidhaḥ ṅolaḥkěn haṅliŋ, hiŋ taṅan ṅolaḥ gahota, hiŋ suku ṅolaḥkěn liŋgiḥ, sumawana lumaris, hiŋ pṛěji ṅolaḥ raḥsêku. Tandỿa gati wṛědiña, kěkětěk dèdunūŋnêki, hanéŋ těŋgok, jaja hugěl hugěl hasta.

EBBY : Ing nétra ngolah pramana, ing lidhah ngolahken angling, ing tangan ngolah gaota, ing suku ngolahken linggih, sumawana lumaris, ing preji ngolah rahsa iku. Tan dỿa gati wredinya, keketek dédunungnéki, anéng tenggok, jaja ugel-ugel asta.

꧄ꦒꦼꦭ꧀ꦲꦸꦒꦼꦭ꧀ꦱꦶꦏꦶꦭ꧀‍ꦏꦭꦮꦤ꧀‍‍ꦲꦶꦁꦥ꧀ꦭꦤ꧀ꦤꦁꦔꦤ꧀ꦲꦩꦸꦁꦏꦱ꧀ꦱꦶ꧉ꦤꦹꦭꦾꦮꦶꦱꦪꦗꦂꦮꦚ꧈ꦥꦁꦒꦮꦺꦭꦶꦩꦁꦥꦿꦏꦮꦶꦱ꧀‍ꦏꦁꦭꦶꦤ꧀ꦤꦏꦺꦴꦤ꧀ꦫꦶꦫꦠꦿꦶ꧈ꦲꦶꦁꦩꦤꦹꦁꦱꦏꦁꦠꦂꦠꦩ꧀ꦠꦸ꧈ꦏꦁꦣꦶꦲꦶꦤ꧀ꦪꦺꦏꦸꦤꦺꦤ꧀ꦢꦿ꧈ꦏꦥꦶꦟ꧀ꦣꦺꦴꦤ꧀ꦤꦺꦪꦺꦏꦸꦠꦔꦶ꧈ꦏꦠꦼꦭꦸꦤ꧀ꦤꦺꦲꦶꦪꦺꦏꦸꦭꦶꦁꦒꦶꦃꦱꦠꦠ꧉꧄

JGST : Gěl hugěl ṣikil kalawan, hiŋ plannaŋṅan hamuŋkasṣi. Nūlỿa wisaya jaṙwaña, paŋgawé limaŋ pŕakawis, kaŋ linnakon ri ratŕi, hiŋ manūŋsa kaŋ taŕtamtu, kaŋ dhihin yêku néndŕa, kapiṅḍonné yêku taṅi, katělunnè hiyêku liŋgih satata.

EBBY : Gel-ugel sikil kalawan, ing planangan amungkasi. Nulya wiyasa jarwanya, panggawé limang prakawis, kang linakon ri ratri, ing manungsa kang tartamtu, kang dhihin yèku néndra, kapindhoné yèku tangi, kateluné iya iku linggih satata.

꧄ꦏꦁꦏꦥꦶꦁꦥꦠ꧀‍ꦔꦢꦼꦒ꧀‍‍ꦧ꧀ꦭꦏ꧈ꦒꦤ꧀ꦤꦼꦥ꧀ꦥꦺꦭꦶꦩꦭꦸꦩꦫꦶꦱ꧀꧈ꦲꦶꦤ꧀ꦢꦿꦶ꧇ꦧꦪꦸꦤ꧀ꦤꦶꦁꦏꦁꦩꦠ꧈ꦢꦺꦤ꧀ꦤꦺꦥꦏꦸꦩ꧀ꦥꦸꦭ꧀ꦭꦤ꧀ꦱꦏꦶꦁ꧈ꦲꦶꦁꦲꦶꦫꦸꦁꦲꦸꦠꦼꦏ꧀‍ꦏꦸꦥꦶꦁ꧈ꦥꦱꦸꦂꦪꦤ꧀‍‍ꦩꦾꦁꦱꦏꦶꦁꦏꦭ꧀ꦧꦹ꧉ꦪꦏ꧀ꦱꦮꦽꦢꦶꦢꦤ꧀ꦤꦮ꧈ꦮꦢꦺꦴꦤ꧀ꦲꦱꦶꦱꦶꦪꦸꦁꦩꦶꦔꦶꦱ꧀꧈ꦢꦶꦠꦾꦮꦤ꧀ꦢꦸꦩꦸꦭꦢꦢꦾꦮꦠꦏ꧀ꦭꦶꦩ꧉꧄

JGST : Kaŋ kapiŋ pat ṅaděk blaka, ganněppé lima lumaris, hindŕi : bayunniŋ kaŋ mata, dénné pakumpullan ṣakiŋ, hiŋ hiruŋ hutěk kupiŋ, pasuṙyan mỿaŋ sakiŋ kalbhū. Yakṣa wṛědi dannawa, wadon hasisiyuŋ miṅis, ditỿa wandu mula dadỿa watak lima.

EBBY : Kang kaping pat ngadek blaka, ganepé lima lumaris, indri : bayuning kang mata, déné pakumpulan saking, ing irung utek kuping, pasuryan myang kalbu. Yaksa wredi danawa, wadon asisiyung mingis, ditya wandu mula dadya watak lima.

꧄ꦢꦺꦢꦢꦾꦥꦤꦹꦁꦒꦭ꧀ꦭꦶꦫ꧈ꦧꦸꦠꦱꦏꦮꦤ꧀ꦧꦸꦥꦠꦶ꧈ꦭꦶꦩꦤ꧀ꦤꦺꦥꦿꦶꦪꦁꦒꦤ꧀ꦤꦶꦫ꧉ꦱꦫ꧇ꦭꦟ꧀ꦣꦼꦥ꧀ꦠꦺꦏꦁꦮꦽꦢꦶ꧈ꦤꦭꦶꦏꦗꦩꦤ꧀ꦔꦸꦤ꧀ꦤꦶ꧈ꦒꦩꦤ꧀ꦏꦁꦫꦤ꧀ꦱꦫꦲꦶꦏꦹ꧈ꦭꦟ꧀ꦣꦼꦥ꧀ꦭꦶꦩꦁꦮꦢꦤ꧉ꦢꦺꦩꦫꦸꦠꦲꦶꦏꦸꦲꦔꦶꦤ꧀‌ꦏꦁꦲꦔꦶꦫꦶꦢ꧀ꦒꦤ꧀ꦢꦤ꧀ꦤꦶꦫꦺꦁꦱꦼꦏꦂꦒꦁꦱꦭ꧀꧈꧄

JGST : Dé dadỿa panūŋgallira, buta sakawan bhupati, limanné pŕiyaŋgannira. Sara : laṇḍěp tékaŋ wṛědi, nalika jaman ṇunni, gaman kaŋ ran ṣara hikū, laṇḍěp limaŋ wadana. Dé maruta hiku haṅin, kaŋ haṅirid gandannirêŋ sěkaṙ gaŋsal.

EBBY : Dé dadya panunggalira, buta sakawan bupati, limané priyangganira. Sara : landhep tékang wredi, nalika jaman nguni, gaman kang aran sara iku, landhep limang wadana. Dé maruta iku angin, kang angirid gandanirèng sekar gangsal.

꧄ꦱꦼꦏꦂꦗꦮꦃꦱꦏꦶꦁꦢꦺꦮ꧈ꦱꦼꦏꦂꦲꦩꦾꦁꦠꦩꦤ꧀ꦱꦫꦶ꧈ꦱꦼꦏꦂꦏꦁꦒꦺꦴꦥꦔꦸꦏꦸꦥ꧀ꦥꦤ꧀‍‍ꦱꦼꦏꦂꦒꦼꦭꦸꦁ꧇ꦭꦮꦤ꧀ꦱꦫꦶ꧈ꦱꦼꦧꦂꦫꦤ꧀ꦤꦶꦁꦗꦶꦤ꧀ꦤꦼꦩ꧀ꦩꦿꦶꦏ꧀꧈ꦢꦺꦥꦮꦤꦠꦼꦒꦼꦱ꧀ꦱꦶꦥꦸꦤ꧀꧈ꦲꦔꦶꦤ꧀ꦲꦢꦽꦱ꧀ꦲꦶꦪꦺꦏ꧈ꦱꦏꦏꦺꦧ꧀ꦭꦠꦥꦠ꧀‌‍ꦩꦾꦁꦔꦶꦁꦒꦶꦭ꧀꧈ꦧꦤꦲꦶꦏꦸꦲꦭꦱ꧀ꦲꦒꦸꦁꦮꦽꦢꦶꦤ꧀ꦤꦶꦫ꧉꧄

JGST : Sěkaṙ jawaḥ sakiŋ déwa, sěkaṙ hamỿaŋ taman ṣari, sěkaṙ kaŋgo paṅukuppan, sekaṙ gěluŋ : lawan ṣari, sěbaṙranniŋ jinněmmŕik, dé pawana tegěssipun, haṅin hadŕěs hiyêka, saka kéblat pat mỿaŋ ṅiŋgil, bana hiku halas haguŋ wṛědinnira.

EBBY : Sekar jawah saking déwa, sekar amyang taman sari, sekar kanggo pangukupan, sekar gelung : lawan sari, sebaraning jinemrik, dé pawana tegesipun, angin adres iyèka, saka kéblat pat myang nginggil, bana iku alas agung wredinira.

꧄ꦩꦸꦭꦢꦢꦶꦮꦠꦏ꧀ꦭꦶꦩ꧈ꦧꦧꦪꦭꦶꦩꦁꦥꦿꦏꦮꦶꦱ꧀꧈ꦏꦸꦭꦩꦕꦤ꧀‍‍ꦲꦱꦸꦲꦗꦒ꧀‍ꦢꦤ꧀ꦤꦮꦭꦮꦤ꧀ꦥꦚ꧀ꦗꦮꦶ꧉ꦩꦂꦒꦤꦥꦺꦴꦤ꧀ꦤꦁꦮꦽꦢꦶ꧈ꦲꦔꦶꦤ꧀ꦲꦤꦺꦁꦲꦶꦁꦢꦼꦭꦁꦒꦸꦁ꧈ꦪꦺꦏꦸꦤꦥꦱ꧀ꦏꦁꦩꦼꦢꦭ꧀‍‍ꦲꦶꦁꦥꦺꦴꦚ꧀ꦕꦢꦿꦶꦪꦤ꧀ꦤꦶꦫꦺꦏꦶ꧈ꦱꦩꦶꦫꦤꦗꦂꦮꦚꦲꦔꦶꦤ꧀ꦏꦁꦧꦸꦮꦁ꧉꧄

JGST : Mula dadi watak lima, babaya limaŋ pŕakawis, kula macan, hasu hajag, dannawa lawan paṇjawi. Maṙgana ponaŋ wṛědi, haṅin hanéŋ hiŋ dělaŋguŋ, yêku napas kaŋ mědal, hiŋ poñca dŕiyannirêki, samirana jaṙwaña haṅin kaŋ buwaŋ.

EBBY : Mula dadi watak lima, babaya limang prakawis, kula macan, asu ajag, danawa lawan panjawi. Margana ponang wredi, angin anéng ing delanggung, yèku napas kang medal, ing ponca driyanirèki, samirana jarwanya angin kang buwang.

꧄ꦏꦫꦶꦔꦼꦠ꧀ꦭꦶꦩꦁꦥꦁꦒꦺꦴꦤ꧀ꦤꦤ꧀‍ꦫꦲꦶꦧꦲꦸꦗꦗꦒꦶꦒꦶꦂ꧈ꦱꦸꦏꦸꦗꦁꦏꦼꦥ꧀ꦥꦺꦭꦶꦭꦶꦩ꧉ꦢꦾꦤ꧀‌ꦮꦫꦪꦁꦏꦤ꧀ꦤꦁꦮꦽꦢꦶ꧈ꦱꦚ꧀ꦗꦠꦢꦺꦭꦟ꧀ꦣꦼꦥ꧀ꦥꦶꦁ꧈ꦧꦭꦶꦩ꧀ꦧꦶꦁꦔꦤ꧀ꦲꦤꦕꦠꦸꦂ꧈ꦭꦶꦩꦤ꧀ꦤꦺꦥꦸꦕꦸꦏ꧀ꦏꦶꦫ꧉ꦢꦺꦥꦺꦴꦚ꧀ꦕꦧꦪꦸꦱꦪꦼꦏ꧀ꦠꦶ꧈ꦏꦁꦏꦲꦁꦒꦼꦥ꧀ꦥꦸꦠꦿꦺꦁꦲꦾꦁꦨꦪ꧀ꦮꦺꦏꦸꦭꦶꦩ꧉꧄

JGST : Kariṅět limaŋ paŋgonnan, rahi bahu jaja gigiṙ, suku jaŋkeppé lilima. Dỿan warayaŋ kannaŋ wṛědi, sañjata dé laṇḍěppiŋ, balimbhiŋṅan hana catuṙ, limanné pucukkira. Dé poñca bayu sayěkti, kaŋ kahaŋgěp putŕêng hỿaŋ bhaywêku lima.

EBBY : Karinget limang panggonan, rai bau jaja gigir, suku jangkepé lilima. Dyan warayang kanang wredi, sanjata dé landheping, balimbingan ana catur, limané pucukira. Dé ponca bayu sayekti, kang kaanggep putrèng hyang bhaywèku lima.

꧄ꦏꦁꦣꦶꦲꦶꦤ꧀ꦮꦶꦭ꧀‌ꦗꦗꦭ꧀ꦮꦽꦏ꧈ꦏꦥꦶꦲꦟ꧀ꦤꦺꦴꦩ꧀ꦩꦤ꧀ꦥꦶꦁꦏꦭꦶꦃ꧈ꦏꦠꦿꦶꦒꦶꦫꦶꦩꦲꦺꦟꦏ꧈ꦕꦠꦸꦂꦯꦺꦠꦸꦧꦺꦴꦤ꧀ꦢꦲꦺꦰ꧀ꦛꦶ꧈ꦨꦿꦠꦱꦺꦟ꧀ꦤꦩꦿꦒꦶꦭ꧀ꦭꦶ꧉ꦒꦾꦮꦶꦱꦶꦏ꧀ꦏꦤ꧀‍ꦠꦼꦒꦼꦱ꧀ꦱꦶꦥꦸꦤ꧀‍ꦮꦁꦱꦶꦠ꧀ꦒꦸꦫꦸꦭꦶꦩꦁꦧꦧ꧀‍ꦠꦸꦢꦹꦃꦏꦢꦢꦺꦪꦤ꧀ꦤꦺꦏꦶ꧈ꦢꦸꦢꦸꦤꦸꦁꦔꦤ꧀ꦲꦶꦪꦲꦶꦏꦸꦲꦮꦭꦶꦩ꧉꧄

JGST : Kaŋ dhihin wil jajal wṛěka, kapi hannoman piŋ kaliḥ, katŕi giri mahéṇaka, catuṙ śétu bonda héṣṭi, bhŕataséṇna mŕagilli. Gỿa wisikkan těgěsṣipun, waŋsit guru limaŋ bab, tudūḥ kadadèyannèki, dudunuŋṇan hiya hiku hawa lima.

EBBY : Kang dhihin wil jajal wreka, kapin hanoman ping kalih, katri giri mahénaka, catur sétu bonda ésthi, bhrataséna mragili. Gya wisikan tegesipun, wangsit guru limang bab, tuduh kadadèyanèki, dudunungan iya iku hawa lima.

꧄ꦒꦸꦭꦶꦁꦔꦤ꧀꧇ꦲꦔꦶꦤ꧀ꦏꦁꦩꦼꦢꦭ꧀‍‍ꦲꦶꦁꦥꦠꦸꦫꦺꦴꦤ꧀‍ꦢꦺꦤ꧀ꦮꦂꦢꦺꦤ꧀ꦤꦶ꧈ꦲꦔꦶꦤ꧀ꦤꦶꦁꦥꦸꦭꦁꦲꦱ꧀ꦩꦫ꧈ꦩꦂꦩꦮꦠꦏ꧀ꦒꦁꦱꦭ꧀ꦲꦮꦶꦠ꧀‍ꦢꦺꦏꦉꦱ꧀ꦩꦺꦤ꧀ꦥꦸꦤ꧀ꦤꦶꦏꦶ꧈ꦔꦼꦢꦭ꧀ꦏꦼꦤ꧀ꦲꦔꦶꦤ꧀ꦭꦶꦩꦺꦏꦸ꧈ꦣꦶꦲꦶꦤ꧀ꦲꦔꦶꦤ꧀ꦤꦶꦁꦒꦿꦤ꧈ꦢꦸꦩꦸꦤꦸꦁꦥꦔꦫꦱ꧀ꦪꦼꦏ꧀ꦠꦶ꧈ꦏꦥꦶꦁꦏꦭꦶꦃꦲꦔꦶꦤ꧀ꦩꦼꦢꦭ꧀ꦠꦸꦠꦸꦏ꧀ꦲꦶꦏ꧉꧄

JGST : guliŋṅan ; haṅin kaŋ mědal, hiŋ paturon dén waṙdénni, haṅinniŋ pulaŋ hasmara, maṙma watak gaŋsal hawit, dé kaṛěsmèn punniki, ṅědalkěn haṅin limêku, dhihin haṅinniŋ gŕana, dumunuŋ paṅaras yěkti, kapiŋ kaliḥ haṅin mědal tutuk hika.

EBBY : gulingan ; angin kang medal, ing paturon dén wardéni, angining pulang asmara, marma watak gangsal awit, dé karesmèn puniki, ngedalken angin limèku, dhihin angin grana, dumunung pangaras yekti, kaping kalih angin medal tutuk ika.

꧄ꦢꦹꦩꦸꦤꦸꦁꦥꦔꦸꦔꦿꦸꦩ꧀ꦩꦶꦫ꧈ꦥꦶꦁꦠꦶꦒꦱꦶꦁꦭꦂꦤꦩꦶꦗꦶꦭ꧀‍ꦫꦸꦔꦸꦫꦶꦤꦸꦔꦸꦢꦸꦤꦸꦁꦚ꧈ꦏꦥꦶꦁꦥꦠ꧀ꦲꦔꦶꦤ꧀ꦏꦁꦩꦶꦗꦶꦭ꧀꧈‍ꦱꦏꦶꦁꦥꦤ꧀ꦤꦶꦁꦔꦭ꧀ꦪꦼꦏ꧀ꦠꦶ꧈ꦭꦶꦭꦶꦁꦭꦶꦤ꧀ꦤꦶꦭꦶꦁꦢꦸꦩꦸꦤꦸꦁ꧈ꦏꦥꦶꦁꦒꦁꦱꦭ꧀ꦮꦶꦤ꧀ꦤꦂꦤ꧈ꦲꦔꦶꦤ꧀ꦱꦏꦶꦁꦧꦢꦤ꧀ꦩꦶꦗꦶꦭ꧀‍ꦢꦸꦤꦸꦁꦔꦶꦫꦥꦤ꧀ꦲꦤꦺꦁꦲꦱ꧀ꦩꦫꦒꦩ꧉꧄

JGST : Dūmunuŋ paṅuṅŕummira, piŋ tiga siŋkaṙna mijil, ruṅu rinuṅu dunuŋña, kapiŋ pat haṅin kaŋ mijil, sakiŋ panniṅal yěkti, liliŋ linniliŋ dumunuŋ, kapiŋ gaŋsal winnaṙna, haṅin ṣakiŋ badan mijil, dunuŋṅira pan hanêŋ hasmaragama.

EBBY : Dumunung pangungrumira, ping tiga singkarna mijil, rungu rinungu dunungnya, kaping pat angin kang mijil, saking paningal yekti, liling liniling dumunung, kaping gangsal winarna, angin saking badan mijil, dunungira pan anèng asmaragama.

꧄ꦭꦶꦩꦠꦼꦒꦼꦱ꧀ꦱꦶꦥꦸꦤ꧀ꦒꦁꦱꦭ꧀‍‍ꦲꦥꦤ꧀ꦲꦸꦮꦸꦱ꧀ꦠꦼꦩ꧀ꦧꦸꦁꦗꦂꦮꦶ꧈ꦩꦶꦭꦢꦢꦾꦮꦠꦏ꧀ꦒꦁꦱꦭ꧀‍ꦢꦺꦤ꧀ꦤꦺꦱꦩ꧀ꦥꦸꦤ꧀ꦲꦩꦱ꧀ꦠꦤ꧀ꦤꦶ꧈ꦲꦺꦠꦁꦭꦶꦩꦥꦸꦤ꧀ꦤꦶꦏꦶ꧈ꦗꦶꦫꦺꦴꦭꦸꦥꦠ꧀‍ꦭꦶꦩꦶꦲꦶꦏꦸ꧉ꦮꦸꦱ꧀ꦠꦶꦠꦶꦮꦠꦏ꧀ꦭꦶꦩ꧉ꦤꦶꦲꦤ꧀ꦮꦠꦏ꧀ꦤꦺꦩ꧀ꦮꦶꦤ꧀ꦤꦂꦢꦶ꧈ꦱꦭꦶꦤ꧀ꦠꦼꦩ꧀ꦧꦁꦩꦩꦿꦶꦃꦩꦩꦤ꧀ꦤꦶꦱ꧀ꦱꦶꦁꦒꦶꦠ꧉꧄

JGST : Lima těgěsṣipun gaŋsal, hapan huwus těmbhuŋ jaṙwi, mila dadỿa watak gaŋsal, dénné sampun hamastanni, hétaŋ lima punniki, ji ro lu pat lima hiku. Wus titi watak lima. Nihan watak něm winnardi, salin těmbhaŋ mamŕiḥ mamannisṣiŋ gita.

EBBY : Lima tegesipun gangsal, apan uwus tembung jarwi, mila dadya watak gangsal, déné sampun amastani, étang lima puniki, ji ro lu pat lima iku. Wus titi watak lima. Nihan watak nem winardi, salin tembang mamrih mamanising gita.

http://ꦱꦼꦒꦗꦧꦸꦁ.id

weddhasangkala